挪威将於周五(13日)凌晨欧国盃外围赛作客塞浦路斯，关乎球队出线命运，但首席射手艾宁夏兰特脚风唔顺，近3场比赛都食白果。幸好挪威人才辈出，18岁新星纽沙今年晋身大国脚後，2次上阵都创造入波，今仗随时再次助攻艾宁夏兰特建功。

现时效力比甲劲旅布鲁日嘅纽沙，个人技术出众，有「挪威尼马」之称，佢今年9月首次晋身大国脚，立即有佳作，第1次上阵就入1球及1次助攻，帮挪威大胜约旦6比0，跟住上仗欧国外，佢分别传畀艾宁夏兰特、马田奥迪加特入波，以2比1击败格鲁吉亚，换言之纽沙2次为挪威披甲，已经创造4球，包括入1球及3次助攻，非常犀利。

拥有尼日利亚血统嘅纽沙早於上年9月欧联分组赛已打出名堂，射入波图大门，协助布鲁日大胜4比0，成为欧联史上最年轻首次上阵入波球员，今年1月传出曼城主帅哥迪奥拿有意签入佢，话唔定不久将来，纽沙可以喺「蓝月亮」同夏兰特合作。