热刺今季季初成绩突出，夏天几位新兵表现对办，球队早前聘请嘅新总监兰治，亦系喺11月正式上场。热刺领队普斯迪高路表明，已经同兰治就1月转会窗制订策略，传闻将会打曼城中场加云菲腊斯嘅主意。

热刺前总监柏拉迪斯因卷入祖云达斯「造数丑闻」被禁赛，事後亦同热刺解约，前阿士东维拉总监兰治会喺11月1日正式上任，普斯迪高路表示：「自从落实聘请後，我同兰治已经倾过几次，呢个位置(总监)对所有大球会嚟讲非常重要，我好期待同佢合作，1月转会窗冇几耐就展开，佢肯定会参与其中。」

据英国《Football London》报道，兰治之前喺维拉嘅买人风格，都系偏向喺英超挖角「即食」球员，据报喺曼城失宠嘅中场加云菲腊斯系主要目标，尤其丹麦中场贺积查治好可能会离队，热刺将有资金同空间接收呢位英格兰国脚。