曼联3比4输畀哥本哈根後欧联跌落榜尾，已经升上被炒领队榜首嘅坦哈格赔率进一步升温，最热系1.8倍，呢个时候几位曼联名宿齐唱反调，史高斯、里奥费迪南、夏格维斯认为，曼联成绩实在差，但频繁炒领队解决唔到问题。

红魔鬼开季至今17战8胜9负，胜率低於50%，对上一次呢个成绩系1973至74年球季，距今50年，当季曼联最终降班，虽然今季英超有「榜尾三宝」垫底，应该唔使惊降班，但坦哈格肯定要孭镬。

《每日邮报》访问几位曼联名宿睇法，呢班名宿经常指点江山，但今次竟然齐撑坦哈格，前队长里奥费迪南表示：「我认为必须坚持力撑主教练，不过呢个成绩实在太差，呢场亦踢得曳。」

前中场史高斯指出：「佢(坦哈格)带队度过唔错嘅一年，争取到一啲时间，球队依家出现伤病，但系17场输9场确实系差。主帅经常喺第2或第3年被解雇，但我哋再无法承担呢个後果，必须畀坦哈格继续教，佢系目前为止最好嘅。」

夏格维斯认为再炒教练都解决唔到问题：「今场佢哋有2、30分钟踢得唔错，17场输9场嘅数据确实唔好，但曼联必须支持佢，再换帅都唔系办法。」