曼联喺欧联3比4输畀哥本哈根，不过丹麦前锋海伦仍然可以昂首离场，呢位射手今场梅开二度，喺欧联射手榜超越艾宁夏兰特，同艾华路莫拉达以5球并列第1位，同时打破贝碧托夫嘅球会纪录(头4场欧联入4球)，成为曼联史上最快喺欧联入5球球员。

20岁嘅海伦今夏由阿特兰大加盟後，喺英超仍未有入波或者助攻，惨成「008」，不过踢欧联就判若两人，首仗对拜仁慕尼黑梅开二度，第2场对加拉塔沙雷再入1球，今仗再一次「起孖」升上射手榜第1位。美中不足嘅系，海伦有入波嘅呢3场赛事，曼联全部输波收场。

有趣嘅系，海伦嘅18岁细佬伊美周四(9日)踢青年欧联，代表哥本哈根U19射破曼联大门，协助哥本哈根U19以2比2逼和曼联U19。至於海伦另一个细佬奥斯卡，今场坐喺哥本哈根後备席未有上阵。