据英国传媒报道，英超今个月将举行一次投票，预料将会通过禁止「同老板球会互相借用球员」条例，希望杜绝「左手交右手」嘅情况出现，明显系针对计划1月份向沙特阿拉伯联赛「招兵」嘅纽卡素。

拥有纽卡素嘅沙特主权财富基金(PIF)，同时亦系沙特4大豪门嘅拥话事人，近期盛传纽卡素喺1月转会窗重开後，将会向希拉尔借用暑假先由狼队过档嘅鲁宾尼维斯，有「左手交右手」之嫌。报道指为阻止呢种行为，英超今个月将举行投票，预计纽卡素以外19队会一致通过，禁止相同老板嘅球会之间借用球员。

消息指呢次禁令会系「暂时性」，而且只系针对外借，因为正式转会已有「第3方拥有权条例」规范，所以未受影响，条例实施後会进行检讨再正式推行。不过，纽卡素可能会提出抗议，因为条例一旦通过，其他19支英超球队仍然可向沙特4大球会借兵，只有纽卡素唔可以，变相系另一种唔公平。