曼城喺欧联大胜提早出线，不过赛後就出现坏消息，史东斯同文路尔艾简治分别受伤，领队哥迪奥拿更指史东斯将要休战「一段时间」，令球队後防兵源紧张。

29岁嘅史东斯今季经常受伤患困扰，开季已因伤缺席头10场比赛，今场欧联佢只踢半场就被换走，赛後哥迪奥拿表示：「好不幸史东斯再次受伤，我戥佢难过，因为佢系个好专业嘅球员，佢对曼城非常重要，今次系肌肉问题，佢要抖一段时间，我唔知实际要几耐，但对球队系个坏消息。」

除咗史东斯之外，瑞士中坚文路尔艾简治同样喺比赛前一刻受伤，哥迪奥拿透露：「艾简治背脊受伤，所以今场唔会踢，佢系喺操练嗰阵整亲，受伤後好似一个75岁老人家咁移动，希望佢唔系太严重，可以喺下场联赛候命。」