周三(8日)凌晨欧联H组赛事，巴塞隆拿作客0比1不敌萨克达，令出线形势再度紧凑。巴塞今仗只有1次中龙埋门，射手罗拔利云度夫斯基更连续6场冇波入，教练沙维赛後闹爆球员，形容今场系巴塞近2年来最差一仗。

3战全胜嘅巴塞，今仗本来赢波就出线，不过今场踢到患得患失，40分钟被萨克达嘅施简头槌攻陷。死气沉沉嘅巴塞喺60分钟一口气换4个球员，但依然冇起色，最终以0比1输波。巴塞目前同波图同得9分，萨克达有6分紧随其後，最後2轮仍然有好大变数。

巴塞今仗只得1次中目标攻门，罗拔利云度夫斯基状态低迷，佢已经连续6场比赛冇波入，系佢自2011年2月後最长嘅入球荒。巴塞教练沙维赛後表示：「冇一样嘢系按照计划进行，今仗系明显退步，我哋喺最重要嘅比赛，踢出近2年其中一场最差嘅赛事。」