今晚西甲独脚戏，毕尔包主场硬撼切尔达。毕尔包喺自己地头出击例抢缰，遇上近8仗联赛未赢过嘅切尔达，一定会先发制人，半场主胜咪错过。

毕尔包今季表现稳定，现时位居前列，开咧後踢咗12仗联赛仅3败，仲要系输畀巴塞、皇苏同皇马等劲旅，虽败不辱，亦侧面反映出佢哋对住同级或更弱嘅球队，抢分甚有把握。

「巴斯克雄狮」一向靠主场搵食，虽然今季主场战绩冇以往咁标青，但喺主帅华尔维迪麾下，秉持一开波即抢攻嘅风格，希望尽早锁定胜局，睇番佢哋近5次联赛主场出击，就有4次喺上半场取得领先优势，踢法非常抢缰。

另边厢，切尔达今夏搵嚟名帅宾尼迪斯接手，一心谂住执番正队波。不过「肥宾」自从离开皇马後愈教愈霉，教过纽卡素同爱华顿，中间仲去过中超，的确系out out哋，搞到切尔达开季後12仗联赛，只得1胜4和7负，入得11粒，系联赛入波第二少球队，一向单天保至尊嘅前锋伊亚高艾斯巴斯，亦岁月催人老，令「肥宾」冇晒计，难怪沦落到喺下游挣扎。今次仲要造访由「威廉斯兄弟」伊拿基威廉斯同尼高拉斯威廉斯领衔嘅毕尔包锋线，随时连半场都顶唔住。