曼联喺英超作客3比0大破爱华顿，阿历真度加拿祖嘅倒挂入波出尽风头，不过论成场嘅演出同贡献，首次喺英超担正嘅18岁中场马恩奥更加突出。马恩奥嘅攻守全能表现，获网民大赞系「巅峰期保罗普巴」，连般奴费南迪斯都话佢先系今场真正「全场最佳球员」！

被坦哈格睇好嘅马恩奥，喺季前热身受伤後一直缺阵，今仗佢抢赢苏夫恩岩拉伯特个正选，表现非常出色，录得100%拦截成功、5次争抢成功、3次重夺球权、1次解围同1次封阻，41次传球亦有83%成功率，包括2次长传，3次扭波有2次成功过人，网民大赞系巅峰时期保罗普巴嘅表现。

加拿祖获颁「全场最佳球员」奖座，不过队长般奴费南迪斯赛後直指，马恩奥先最值得拎MVP，佢被问到呢个奖嘅安排嗰阵回应：「加拿祖表现一般啦，我咁讲因为佢知道我对佢有更高期望，我赞同佢拎奖只因为个入球。我认为马恩奥先系MVP，佢用波舒服而且零犯错，喺佢个年纪真系好高质素。」