上年世界盃冠军阿根廷陷入危机，领队史卡朗尼早前突然暗示可能辞职，并且唔会出席12月7日美洲国家盃抽签仪式，似乎已经到咗非走不可地步，据悉呢位45岁名帅不满自己薪酬偏低，加上阿根廷足总拖欠球队4,200万欧元(约3.6亿港元)世界盃夺冠奖金，所以想劈炮。

阿根廷上场世盃外击败巴西後，史卡朗尼暗示想离队：「现时系时候停下来思考，球员畀咗我好多嘢，我都要认真谂下将来要点做，担任阿根廷领队嘅要求非常高，球队需要1位充满活力嘅领队。」除咗呢番疑似告别宣言之外，根据《ESPN》爆料，史卡朗尼唔会出席下月美洲国家盃抽签仪式，皆因佢同阿根廷足总会长泰比已经决裂。

据悉史卡朗尼原本合约去到2026年，佢不满协助阿根廷捧世界盃冠军後，未获得提升薪酬待遇，仅有260万欧元年薪，相比曼城领队哥迪奥拿2,200万欧元年薪，拜仁慕尼黑教练杜曹1,200万欧元年薪、罗马教练摩连奴900万欧元年薪，史卡朗尼嘅人工简直系耻辱。

加上阿根廷足总仲未发放世界盃奖金，令史帅更加不满，所以想走人，去执教欧洲球会搵真银。盛传皇马会长皮里兹有意请史卡朗尼接替明夏离队嘅安察洛堤，届时佢嘅人工肯定三级跳，难怪唔怕同阿根廷足总会长泰比反面。