曼城对利物浦嘅英超巅峰对决，最终踢成1比1平手，不过完场後双方就唔太「和气」，利物浦前锋达云纽尼斯同曼城领队哥迪奥拿握手後，疑似讲咗啲嘢辣着「哥帅」，搞到对方扯晒火，利物浦领队高普亦第1时间拉走达云纽尼斯，制止冲突升级。

达云纽尼斯今场多次失机，完场前5分钟被换走，比赛结束後佢同哥迪奥拿握手，突然间哥迪奥拿情绪激动，高普即刻将达云纽尼斯拉走，其他职员就隔开哥迪奥拿。高普事後解释：「一时嘅情绪啫！我未必系最佳回答人选，因为我完全冇参与，我爱佢哋两个，所以只系想叫佢哋冷静，我完全唔知发生乜事。两队都想赢，但系两队都赢唔到，所以冇人开心。」

至於主角之一嘅哥迪奥拿，赛後记者就三缄其口，但明显仲系「有火」：「(同纽尼斯)冇事发生。我冇对战果不满，而且为球队表现开心，但我估唔到记者会第2条问题就问呢样(赛後冲突)，我估你哋会最後先问，但系我同纽尼斯冇事发生。」