巴西球星尼马喺10月世界围外围赛受重伤後，曾经传闻会休息半年，「森巴兵团」军医拉斯马最新透露，呢位31岁前锋起码需要养伤9个月，肯定无缘明年6月至7月举行嘅美洲国家盃，预料可以赶及明年8月复出迎接下季赛事。

尼马因为左膝十字韧带及半月板受伤，已经接受手术，巴西军医拉斯马近日被问到呢位效力沙特阿拉伯豪门希拉尔嘅球星，几时可以复出，佢话：「现时讲复出，言之尚早，勉强加快康复疗程同冒不必要嘅风险，都系冇意义，我哋期望佢2024年夏天新一季展开前，准备好上阵，即系明年8月。」

尼马长抖之下，意味将第3次缺席美洲国家盃，之前2次分别系2016年因为要踢奥运，无法分身，以及2019年因伤冇入选。不过，唔少网民及巴西球迷认为尼马无缘美洲国家队，对於「森巴兵团」争冠反而系好事，因为佢2011、15及21年参赛，巴西都捧唔到盃，2019年缺少尼马，却夺得冠军，巴西今届应该有运行。