今晚英超快车尾场，爱华顿主场硬撼衞冕嘅曼城。曼城虽然啱啱勇夺世冠盃，但远赴亚洲舟车劳顿未回气，「拖肥糖」近期主场频频抢到分，防守回稳系关键，两军近年交手初段例少交收，1.5球半场细不妨追多铺。

曼城上星期远赴沙特阿拉伯，连挫浦和红钻同富明尼斯首捧世冠盃，完成5冠王霸业，尽管全程兵不血刃，不过始终飞去亚洲比赛，一来一回都几辛苦。中场洛迪卡斯简迪喺决赛对富明尼斯更加伤出，虽然话佢只系轻伤，但要知道呢位西班牙国脚之前4次缺阵「蓝月亮」竟然输晒，如果佢唔弗，对中场转守为攻都咪话冇影响，加上神锋艾宁夏兰特刚伤愈，就算出得亦状态成疑；睇番佢哋近5场联赛仅1胜，有4次半场开1球或以下，初段进攻总系未入局。

另边厢，爱华顿虽然上场对热刺惜败，但表现不落下风，近5场联赛取得4胜1负，完全冇受之前联赛被扣10分一事所影响。主帅戴治对自己班波有几多斤両好了解，深明若果先失波好难追得番，因此非常看重初段防守，只要守住唔好先失波就有机会偷鸡，单计近5场主场联赛，有4次上半场保持清白之身，而呢4场都有分落袋，今场必定照办煮碗。翻查纪录，双方近4次碰头，有3次半场开1球或以下，预计今场初段都系小心为主，1.5球半场细有计。