AC米兰教练皮奥利今季积极提拔年轻球员，除咗15岁前锋卡马达之外，18岁中坚真卡路史米表现亦备受关注，甚至已经获得多间大球会垂青，A米为咗留住呢位明日之星，即将同佢续长约。

真卡路史米来自一个塞尔维亚家庭，佢喺德国出世，曾於史特加青年军受训，2022年转投AC米兰青年军，今季获提升上一队，上月对蒙沙，佢入替受伤嘅普比加，首次上阵表现一鸣惊人，并射入1球，成为自1994/95球季意甲实行3分制以来，第3年轻入波嘅AC米兰球员。

真卡路史米近2仗都获得上阵机会，无独有偶都系入替34岁老将卡积亚，皮奥利明显想栽培呢位天才中坚做未来防线骨干。

根据《米兰体育报》报道，有唔少球会想斟介真卡路史米，但AC米兰无意出售，并准备同佢续约，呢位塞尔维亚U19小国脚曾经讲过，自细视A米传奇後衞马甸尼为偶像，希望将来取得马甸尼嘅成就，所以相信佢乐意续约。

由於A米中坚汤姆利正在养伤，周三(3日)凌晨意大利盃16强对卡利亚里，真卡路史米有望担正。