曼联中坚华拉尼将於今季结束後约满，原本会方有权同佢续约1年，但根据英国传媒《talkSPORT》爆料，红魔鬼决赛放弃启动续约条款，意味呢位30岁法国球星现时可以自由同其他球会倾加盟事宜，盛传德甲劲旅拜仁慕尼黑抢先出手，希望1月就签入华拉尼，舒缓中坚人脚紧张问题。

华拉尼周薪高达34万镑(约340万港元)，但经常受伤患问题困扰，导致上阵时间唔多，今季状态进一步下滑，据报会方曾经要求佢减薪续约1年，但倾唔掂数，所以宁愿畀佢夏天自由身走人。

华拉尼名气大，不愁出路，当中以拜仁慕尼黑最有兴趣签入佢，甚至愿意开出2,000万欧元(约1.72亿港元)转会费，提早今个月买入华拉尼，皆因拜仁2位中坚乌柏美卡奴、马菲斯迪历特不时受伤，想签入华拉尼以备不时之需，提升争标实力。

除咗拜仁慕尼黑之外，皇马亦有意邀请华拉尼回巢，因为「银河舰队」防线伤兵问题严重，2位中坚艾达米列达奥、阿拉巴长抖，令教练安察洛堤好头痛，华拉尼曾经效力皇马10年，熟悉球队运作，签入佢可以解燃眉之急。