曼联喺英超1比2不敌诺定咸森林，翼锋安东尼马菲奥斯被各大传媒评为今场表现最差球员，呢位转会费高达8,700万镑(约8.7亿港元)嘅巴西国脚今季各项赛事上阵21次0入波0助攻，今仗仲要伤出，红魔鬼史上最差收购非佢莫属。

安东尼马菲奥斯2022年夏天由阿积士加盟曼联後，表现一直备受批评，今季演出进一步下滑，为红魔鬼踢21场比赛，冇入波亦冇助攻。单计2023年英超赛事，呢位23岁翼锋踢33场联赛仅入1球，而且已经系4月对诺定咸森林，今仗同样对森林，安东尼马菲奥斯踢咗54分钟就伤出。

曼联名宿舒米高都睇唔过眼，认为领队坦哈格必须重新考虑安东尼嘅位置，其实曼联早前反胜阿士东维拉，坦哈格收起安东尼，改由阿历真度加拿祖踢右翼，效果唔错，但今场又用番安东尼出任正选，输波可以话系咎由自取，难怪唔少红魔球迷希望安东尼今次可以养伤多一段时间，球队或者有救。