英格兰中场佐敦轩达臣，上年夏天争议性由利物浦转投伊蒂法克，虽然周薪高达70万镑(约700万港元)，不过半年过後仍然未能适应沙特阿拉伯联赛，球队成绩同佢个人表现都令人失望。据报佐敦轩达臣已放风，希望冬季转会窗重返英超，就算大幅减薪亦在所不惜。

33岁嘅佐敦轩达臣曾高调批评沙特等国家打压性小众，但自己就被伊蒂法克嘅天价薪酬吸引转会，被唔少人批评「出卖灵魂」。佐敦轩达臣去到沙特後发展差劲，由谢拉特带领嘅伊蒂法克只排第8位，歇冬前9场不胜，平均主场入座率唔够8,000人。英国《每日邮报》报道，为确保有份出战夏天嘅欧国盃，佐敦轩达臣近期向经理人放风，希望可以重返英超搵食。

佐敦轩达臣可唔可以成功转会，要睇佢决心有几大，首先70万镑周薪肯定唔会有球会负担得起，佐敦轩达臣势必要减薪超过5成。另外，佢喺沙特嘅「免税」待遇，系要佢留队至少2年先可以获得，如果佢今个月转会，又要补交约700万镑税款，财政会受极大打击。报道指富咸、水晶宫同纽卡素都物色紧中场球员，亦有不知名德甲球队对佐敦轩达臣有兴趣，就睇佐敦轩达臣点样选择。