英足盃爆发东北打吡，英冠嘅新特兰主场火并英超劲旅纽卡素。打吡战无分级别，呢两大同市宿敌每逢碰头，都踢到飞沙劈石，而且「黑猫」主场嗜攻，撞正伤兵满营嘅纽卡素实多波入，一於捧2.5球大盘。（无綫myTV SUPER周六晚8时45分直播）

一度沉沦嘅新特兰，近年不断升呢，上季已重返英冠，今季亦位居前列，持续进步。「黑猫」全队冇乜星味，最出名嘅皇马中场祖迪比宁咸……个细佬祖比比宁咸，呢位18岁中场的确带起到队波，而前锋积克奇勒今季联赛已有12球进帐，脚风奇顺，佢哋主场出击分外抢缰，近8次主场有6次开3球或以上，非常进取。

纽卡素虽然比新特兰高一个级别，但佢哋伤兵一大箩，包括有排抖嘅钢门尼克普比，哥林威尔逊、捷比亚、祖尔韦洛克、积及梅菲等等，难怪近4场法定时间只得1和3负。

不过纽记上仗造访劲旅利物浦未有退缩，力战之下最终输2比4，随时以攻代守。加上打吡战场合，已经冇分边队实力强弱，大家一定打甩髀，斗攻格局唔会缩，大盘有计。