法国球星基利安麦巴比去向有重大发展，据法国媒体《Foot Mercato》报道，呢位25岁前锋日前同皇家马德里达成协议，将会喺夏天以自由身加盟。巴黎圣日耳门(PSG)周一(8日)凌晨法足盃对业余球队雷维尔，麦巴比令人意外正选上阵，并且连中三元助PSG狂胜9比0晋级。

麦巴比早前宣布唔会执行续约PSG条款後，今个月开始可自由同法国以外球会斟介，据报佢同皇马会长皮里兹连日商讨後，《Foot Mercato》指双方已经达成协议，权威记者Santi Aouna未有公开合约细节，但指皇马开出嘅条件虽然比2022年嗰阵低，但获得麦巴比同意，夏天自由身加盟成为定局。

喺麦巴比离队消息曝光後，PSG喺法足盃作客雷维尔，麦巴比竟然正选披甲，最终麦巴比喺48分钟内完成「帽子戏法」，加上马高阿辛斯奥、干卡路拉莫斯、高路梅安尼等球星入波，轻松大胜9比0晋级。PSG教练安历基赛後未提转会传闻，但就解释麦巴比上阵原因：「麦巴比想落场，佢嘅说话比教练更有份量，当佢落场，教练、队友、观众同对手都会开心。」