曼联喺英足盃顺利晋级第4圈，不过丹麦前锋海伦再次成为箭靶，呢位20岁球星今仗失机频频，包括2次喺龙门口4码点同6码点甩拖，名宿坚尼都忍唔住闹爆：我系领队实会嬲死佢！

季前以7,200万镑转会费加盟嘅海伦，入球产量偏低，今仗对韦根有4次喺10码以内范围起脚，但全部都冇收获，包括一次6码点插水式顶中楣顶、一次门前4码执鸡踢出柱边。虽然海伦表现落力，但12次争抢输咗7次，亦有7次失去控球权纪录。

伊恩胡礼、麦哥斯特等负责评述嘅名宿，都指海伦不断失机表现唔好，对佢表示同情，但前曼联队长坚尼就态度强硬：「我听到有人话同情海伦，你哋太好人啦，我系领队实会嬲死佢！当曼联前锋失机会，成日都话唔够运、唔好彩，但明明就系黄金机会，唔好再搞乱档，将个波摆入网啦！」