非国盃即将展开，但效力曼联嘅喀麦隆门将奥拿拿坚持留队，仍未向国家队报到，甚至连上场英足盃对英甲球队韦根，都以正选踢足全场，令同样今季加盟嘅副选门将比恩迪亚非常无瘾，盛传呢位25岁土耳其国脚打算申请转会。

奥拿拿原本踢完上月底英超对诺定咸森林，就应该返国家队报到，但曼联成功向喀麦隆足总争取，容许佢踢埋周日(14日)深夜英超主场对热刺後，先至返回国家队。由於时间紧逼，奥拿拿肯定无法为喀麦隆出战下周二(16日)凌晨首场分组赛对畿内亚。

如果喀麦隆分组赛出局，奥拿拿1月24日就可以返回曼联，意味副选门将比恩迪亚又要做观众，佢上年夏天加盟曼联以来，仍然未上阵过，反观奥拿拿经常犯错，却稳坐正选。比恩迪亚曾以为奥拿拿离队踢非国盃，就有机会表演，但以目前情况睇，并唔乐观，因而萌生去意。

英国《曼彻斯特晚报》指曼联计划签入昆士柏流浪17岁门将卡伦麦坚拿，似乎为比恩迪亚离队做准备。