曼城上仗英超可以反胜纽卡素3比2，除咗入波兼助攻嘅奇云迪布尼之外，补时射入致胜1球嘅奥斯卡波比亦功不可没，呢位20岁挪威新星比同胞艾宁夏兰特，更加早加盟「蓝月亮」，今季崭露头角，继上月欧联入波後，今仗亦取得职业生涯首个英超入球，令世人知道曼城阵中唔止夏兰特1位挪威人。

拥有冈比亚血统嘅奥斯卡波比2019年7月由挪超球队华拉伦加转投曼城青年军，当时已被英国传媒誉为「蓝月亮」同年龄级别最佳球员，上年9月初对富咸，首次获得英超上阵机会，同月主场对贝尔格莱德红星，上演欧联处子作，其後晋身挪威大国脚，并喺上年11月对法罗群岛嘅热身赛，取得入球。

呢位翼锋愈踢愈有信心，上月最後1轮欧联分组赛作客贝尔格莱德红星，佢更加担任正选，并射入1球，可见领队哥迪奥拿有心栽培呢位明日之星，哥帅付出果然有收获，奥斯卡波比今仗英超建功为球队取得宝贵3分。

赛後奥斯卡波比话：「今场比赛节奏好快，领队要求我入波，幸好我做到，呢个系我一生嘅梦想，可以同世界最佳球队一齐努力赢波，感觉难以形容，我要多谢奇云迪布尼嘅助攻，佢系英超最伟大球员之一，亦系一位好人。」由於艾宁夏兰特仍在养伤，奥斯卡波比未来一段日子应该有唔少机会上阵，分担呢位「大师兄」嘅入球工作。