曼联获新老板拉特克利夫加入後，全面推行重建计划，「拉爵」已率先注资2.5亿镑(约25亿港元)搞基建，其中一项重点计划就系起新训练场。据英国《每日邮报》报道，曼联正倾紧收购一个高尔夫球会，准备兴建全新嘅训练基地，取代依家用紧嘅卡宁顿训练基地。

卡宁顿训练基地喺1999年兴建，但日久失修已经变得残旧，C朗拿度就曾经公开大弹训练基地落後，而且空间已经用尽，连停车场都唔够位。拉特克利夫上场後即物色新地方，至少要有100英亩可建筑嘅土地，报道指曼联正洽谈收购位置Knutsford嘅高尔夫球会，呢间球会喺上年开始放售，但目前未达成共识。呢间高尔夫球会除咗面积够大之外，位置亦非常接近多数球员定居嘅柴郡。

不过《每日邮报》指出，新训练场计划仍未有定案，其中一个方案系喺卡宁顿附近另觅地方，起新训练场畀一队做基地，但就保留卡宁顿，留畀曼联青年军同女子队使用。