意甲罗马周二(16日)官方宣布，主教练摩连奴及其教练团队离任，即时生效。「寸王」在「雌狼」2季半执教生涯亦告结束，不过关於佢下一站去向传闻四起，曼联、车路士、纽卡素，甚至巴西国家队都有可能。

罗马会长丹佛烈金在官网发文：「我代表罗马全体成员感谢荷西(摩连奴)来到罗马後嘅热情和奉献，将永远怀念佢执教，但我认为，为球会最佳利益必须立即做出改变，祝福荷西同佢嘅团队未来一切顺利。」罗马官方称将尽快公布继任人选，盛传名宿迪罗斯将回巢接掌教鞭。

罗马系摩连奴第9支执教球队，同过去8支球队包括车路士两次任期在内，每队执教年期都过唔到3季，因此佢又被称为「摩3季」，而佢喺罗马执教138场，共取得68胜31和39负，前季赢得欧协联冠军及上届欧霸盃亚军。

意大利传媒报道，摩连奴被炒导火线系罗马近期成绩不稳，意大利盃出局及上仗1比3不敌AC米兰，联赛跌至第9，不过「寸王」多次暗示球队唔肯加大投资，因而触怒高层导致决裂，而且摩连奴同罗马合约於今季完结，依家只系提早半季分手。

早在罗马宣布解雇摩连奴之前一段时间，已多次传出呢位60岁名帅即将重返英超，有指佢可能2度执教曼联，又或3度执教车路士，以及接手纽卡素，甚至领队位置一直悬空嘅巴西国家队，都可能搵佢执教，视乎佢点拣。