日前被英超赛会检控财务违规嘅爱华顿同诺定咸森林，周四(18日)凌晨英足盃重赛齐齐晋级，爱华顿主场以1比0击败水晶宫、森林就喺加时3比2淘汰黑池。

爱华顿今场强阵出击，成功控制比赛，安祖高美斯喺42分钟射入精彩罚球打破僵局，水晶宫失守後展开反扑，但爱华顿年轻门将维真尼亚有出色表现，最终保住1比0胜局，下一圈将会对卢顿。

爱华顿领队戴治赛後表示：「呢几日嘅消息(被检控)令人难过，所有爱华顿人都觉得难受，但呢班球员全季都展示出坚强一面，就算今仗表现唔算好，防守一样战意十足，呢一点系最重要。」

至於森林作客英甲嘅黑池，喺领先2球优势下被逼和2比2，好在喺加时战及时振作，由基斯活特喺110分钟攻入致胜球赢3比2，下一圈会作客布里斯托城。