喀麦隆喺非国盃首战失分，因飞机延误而被踢出比赛名单嘅门将奥拿拿，被传大发雷霆，再次同领队桑治出现冲突。不过呢位曼联门将日前公开表示，虽然心入面有好多嘢想爆，但会以「大局为重」，唔会喺非国盃期间搞事，仲叫批评者可以继续攻击佢。

正准备第2场分组赛对塞内加尔，奥拿拿对今次风波回应：「我有好多嘢想讲，但依家唔会咁做，因为我哋踢紧非国盃，就由得我畀大家继续闹啦，我已经习惯晒啦！我做任何事都系以国家队利益为先，球会同国家队就好似爸爸同妈妈，不过国家队永远系第1位，呢个系我喺呢度嘅原因。」

奥拿拿喺周一(15日)踢完对热刺嘅联赛後，唔够24小时就要代表喀麦隆喺非国盃出战，但佢坐私人飞机因天气问题延误，去到後得知被踢出大名单，据报奥拿拿曾大发脾气话：「唔畀我踢，点解我要咁辛苦坐私人飞机赶嚟？」奥拿拿喺卡塔尔世盃期间曾经同桑治闹不和，结果提前离队。