哈利卡尼嘅冠军梦面临幻灭！周日(21日)德甲出现惊人战果，拜仁慕尼黑主场0比1不敌云达不来梅，爆出22倍超冷客W。拜仁16年来首次输畀云达不来梅後，依家落後踢多1场嘅「1哥」利华古逊7分，冠军争夺落入下风。

拜仁今场踢到患得患失，上半场若非门将纽亚神救同VAR帮手，已经要先落後，但去到59分钟始终都要输，米素尔韦沙右路切入大脚抽入。拜仁尾段群起进攻，但为时已晚，自2008年後首次输畀云达不来梅，亦结束连续65次德甲主场入波纪录。

同日利华古逊作客3比2绝杀RB莱比锡，依家领先拜仁7分排榜首，拜仁教练杜曹赛後表示：「今场抵输，我哋踢到唔想赢咁，当你睇到利华古逊嘅成绩，我哋需要尽快回复面貌。联赛只系过咗一半，仲未系考虑冠军嘅时候，但要尽快搵出改善问题嘅方法。」