水晶宫周六(20日)英超作客阿仙奴惨吞5蛋，近10场联赛只得1胜，依家距离降班区仅多5分兼踢多1场，护级形势水深火热。据英国《每日邮报》报道，水晶宫已经物色紧新领队，随时会炒鹤臣鱿鱼。

今场比赛尾段，作客嘅水晶宫球迷拉横额抗议，展示「球场内外嘅潜力都被浪费，差劲决策令球队退步」，消息指水晶宫已决定换帅救亡，依家正联络可能嘅领队人选，目标包括前狼队主帅卢比迪古，以及早前被森林炒鱿嘅谷巴。

鹤臣赛後回应被炒传闻，似乎已有心理准备：「呢个问题应该问管理层，但你如果问我有冇觉得缺乏支持，我嘅答案系冇，水晶宫对我好好，但喺呢个环境下，肯定会倾点样应对，系咪换帅唔系我话事。」

不过，今仗酋长球场就出现稀客，前车路士领队朴达都有入场观战，有传佢可能有意接过水晶宫教鞭。朴达自上年4月被车路士炒鱿後，一直未有落班，佢之前教中型班白礼顿成绩突出，有能力发挥水晶宫嘅「潜力」。