亚洲区F组次轮尾场，吉尔吉斯硬撼沙特阿拉伯。吉尔吉斯自知实力难登大雅之堂，遇强必定玩死守，不过沙特首轮赢得惊险之余，更爆发内讧，加上本身攻力麻麻，2.5球入球细更值博。（HOY TV 77台周一凌晨1时30分直播）

吉尔吉斯今次只系第2次进身亚洲盃决赛周，经验不足，喺F组首轮面对泰国，虽然个个身形高大，但完全唔够踢，畀泰国玩弄於股掌之上，最终仅以0比2落败，已经算系输得少。

吉尔吉斯深明自己有几多料，吸取上轮输波教训，今仗遇强可以叠埋心水摆铁桶阵，希望输少当赢。

另边厢，沙特阿拉伯於F组首轮初段先失1粒之下，末段连追2球先至反胜阿曼2比1，表现认真麻麻，过程惊险真系抹一把汗。最弊系佢哋赛前爆发内讧，艾法拉积、艾加南及艾阿基迪自称系主力，要求担正，但主帅文仙尼讲明佢先至系最後话事人，冇人系必然正选，之後佢哋选择唔参赛，因此文帅冇派佢哋上阵，无论对实力抑或士气都有一定影响。何况沙特攻力一般，近5场有4次开2球或以下，尤其系对住死守不出嘅球队，随时老鼠拉龟冇碇埋手，宁捧2.5球入球细。