曼联名将朗尼月初被伯明翰炒鱿，不过佢囝囝Kai嘅足球事业就一凡风顺，日前佢为曼联U14伤愈复出，即交出2入波同2助攻，带领球队6比0大破列斯联，唔少曼迷都留言支持，希望佢可以子承父业，成为曼联明日之星。

14岁嘅Kai系朗尼大仔，2020年就加入曼联青训，以往流出嘅比赛片段，见到Kai嘅个人技术甚佳，佢周二(22日)喺社交网表示，经过「数个月」养伤後，日前U14联赛复出对列斯联，交出2入波+2助攻嘅成绩，帮曼联U14大胜6比0。

或者系多得「朗尼囝囝」嘅名声，Kai已被捧为最有前途新人之一，2年前更以12岁之龄获PUMA签做代言人，被睇好可以闯一番事业。Kai上年曾经喺一场U13盃赛决赛入波，击败死敌曼城捧盃，司职前锋嘅佢被指有朗尼影子。