近期愈战愈勇嘅曼城，近日飞去阿布扎比集训收到天大喜讯，因伤缺阵差唔多2个月嘅挪威神锋艾宁夏兰特，周二(23日)正式重投操练，有望喺英足盃对热刺一战复出。

艾宁夏兰特因脚骨出现压力反应，自上年12月初开始缺阵，今个月初曾尝试复操，但1星期後因反应未如理想又要暂停，今次喺阿布扎比终於正式回归，佢亦喺社交网站自贴着上全副装备相片，表示：「噢！好挂住呢个(足球)！」

曼城将会喺周六(27日)凌晨英足盃作客热刺，艾宁夏兰特有机会先出任後备，目标系之後主场对般尼嘅联赛复出。曼城近期6连胜，中场核心奇云迪布尼亦伤愈复出，等到艾宁夏兰特回归，火力势必大大增强，挑战利物浦嘅榜首位置。