沙特阿拉伯联赛过去1年疯狂吸纳巨星，不过唔少球星转会後，先发现中东高薪唔易赚，近日就爆出逃亡潮。继佐敦轩达臣回流荷甲阿积士後，宾施马、罗拔图法明奴同米连高域沙域都希望重返欧洲，转会权威Fabrizio Romano证实里昂已准备斟宾施马回巢。

佐敦轩达臣喺沙特半年後解约离队，下一个「逃亡」球星好可能系宾施马，Romano周二(23日)爆料，里昂班主泰斯达喺1个月前已同宾施马展开斟介，前提系要呢位36岁前锋答应大幅减薪。沙特联赛会并唔想失去呢位招牌球星，如果宾施马唔想留效伊蒂哈德，甚至可以安排佢转投其他沙特球会。

不过，宾施马似乎去意已决，早前喺未获球会批准下擅自去渡假，之後又迟归队而被踢出集训营，同教练马些路加拿度关系甚差。宾施马喺里昂出道兼成名，转会皇家马德里前为里昂一队踢过5季，唔排除会答应大幅减薪重返母会。

另外，效力吉达艾阿里嘅巴西前锋罗拔图法明奴，同埋希拉尔中场米连高域沙域，据报都已表达离队意愿，不过吉达艾阿里就坚持法明奴至少踢埋今季，传闻纽卡素、车路士等球会都有兴趣；意大利《信使报》就爆料，指米连高域沙域向拉素表示後悔离队，希望回巢。

效力艾纳斯嘅西班牙中坚拿朴迪，近日接受《阿斯报》访问，承认唔少欧洲球星对沙特生活唔适应：「由欧洲去沙特系好大转变，一切都系讲适应，事实上好多球员都唔满意，好似喺利雅得嘅交通好差，每日有3个钟头时间坐喺车入面，我哋预期有更好嘅生活质素。」