曼城球星菲尔科顿近年极速上位，不过球场外都有唔少负面新闻，原来佢仲有个「非常阿妈」，上年9月因为喺夜店闹事被捕，周三(24日)上庭虽然袭击罪甩身，但公众地方行为不检罪成，罚款事小，累菲尔科顿再有「家丑」事大。

菲尔科顿44岁阿妈Claire Rowlands，上年9月喺威尔斯一间夜店醉酒闹事，打走一名男顾客顶帽後，被赶出酒店後破口大骂，连到场嘅警察都被佢狂闹，结果被捕兼拘留一晚。Claire Rowlands日前上堂，承认当时饮醉酒变成「野兽」，又话估唔到玩下恶作剧会引起咁严重後果。

Claire Rowlands最终打甩袭击罪，但公众地方行为不检罪成，被罚款225镑(约2,250港元)。阿妈呢笔罚款对菲尔科顿嚟讲「湿湿碎」，但就令菲尔科顿「洗底」工程受到影响，佢出道初期有唔少负面新闻，最经典系2020年为英格兰国家队备战期间，同格连活特一齐擅自带女性返球队酒店，结果因违反纪律被国家队赶走；2022年又试过2母子一齐睇拳赛，Claire Rowlands期间同人争执推撞，要被警方问话。