阿士东维拉喺艾美利带领下，近2季成绩突飞猛进，据报维拉计划再签猛将，目标直指加拉塔沙雷翼锋韦费特沙夏。艾美利5年前仲教紧阿仙奴嗰阵，曾公开表明好欣赏呢位科特迪瓦球星，可惜收购未有实现，依家终於有机会实现心愿。

维拉虽然已有奥尼屈坚斯、穆沙戴亚比同里安拜尼3大攻击手，不过仍希望再引入多1名攻击球员。据《Football Transfers》网站报道，佢哋睇中31岁嘅韦费特沙夏，呢位翼锋上年先结束水晶宫8年生涯改投加拉塔沙雷，但重返英超嘅吸引力仍然好大，而且维拉亦有份踢欧洲赛，难怪韦费特沙夏心郁。

据报今次交易系艾美利主张，佢喺2019年执教阿仙奴，已曾要求球会签韦费特沙夏，但结果阿仙奴签入另一翼锋尼高拉斯比比，当时艾美利话：「沙夏可以用一己之力赢波，包括赢热刺、曼城同我哋(阿仙奴)，每次对亲沙夏都会好头痛，佢就系我希望得到嘅球员。」