周四(25日)凌晨西盃8强大战，巴塞隆拿作客毕尔包激战至加时，以2比4输波出局。巴塞嘅16岁新星耶马今场做完英雄做罪人，佢喺上半场射入靓波，但90分钟完结前空门射斜错失「绝杀」机会，导致巴塞喺加时输波。

巴塞今场开波36秒就失守，毕尔包连环射门由古路薛达送个波入网；巴塞企稳阵脚後，26分钟靠罗拔利云度夫斯基一个幸运入波追平，6分钟後耶马个人表演，佢喺右路狂推至禁区顶割草式射入反超前。可惜巴塞半场後又再失魂，被奥汉辛斯特接应传中顶入，将比数追成2比2。

双方之後进入胶着，去到86分钟毕尔包後防犯错，耶马偷波後长驱直进扭过埋龙门，点知面对空门竟然射唔中，错失「绝杀」良机，结果加时阶段巴塞崩溃，伊拿基威廉斯同尼高威廉斯各入一球，带领毕尔包赢4比2进身4强。

巴塞教练沙维赛後拒绝怪责耶马：「作客毕尔包系好差嘅抽签，我哋差少少赢波，而且一直战斗到最後，可以为自己嘅表现骄傲。耶马好沮丧，佢错失咗一次黄金机会，但冇乜好怪责，个机会本身就系佢自己创造出嚟。」