拿玻里射手域陀奥森汉喺意甲日子进入倒数，班主迪罗伦迪斯承认呢位25岁尼日利亚国脚将於今夏离队，盛传英超双雄阿仙奴、车路士最大机会签入域陀奥森汉。

虽然域陀奥森汉刚於上月续约至2026年，但新约毁约金只系1.12亿镑(约11亿港元)，反映只要有球会愿意出价，拿玻里就唔会阻止佢走人，班主迪罗伦迪斯最近接受传媒访问时话：「我哋上年夏天已经知道域陀奥森汉想离队，所以续约过程花费唔少时间，但双方关系良好，我哋知道佢可能转投皇马、巴黎圣日耳门，或者英超顶级球队。」域陀奥森汉早前亦透露今季结束後，将决定前途问题。

域陀奥森汉上季意甲上阵32场入26球，成为联赛神射手，并协助拿玻里相隔33年再次尝到意甲冠军滋味，当时已传出多间大球会想收购域陀奥森汉，但由於拿玻里诸多要求，导致未能成事。

近期传得最多系阿仙奴、车路士同时睇中域陀奥森汉，特别系车仔欠缺1位可靠射手，以佢哋近年挥金如土嘅增兵政策，相信有力买断域陀奥森汉。