利物浦领队高普公布将於今夏离队後，现时担任利华古逊主帅嘅红军名宿沙比阿朗素，被视为接班人大热，呢位42岁西班牙少帅迅速作出回应，暗示唔除排接受利物浦邀请，双方眉来眼去，可能真系有机会成事。

沙比阿朗素球员生涯曾於2004至09年效力利物浦，被问到高普即将离开利物浦，并可能搵佢接任时，沙比话：「我对呢件事感到好意外，我非常尊重高普同利物浦，我好享受现时嘅工作，利华古逊正在经历一段美好旅程，充满挑战性，至於出现有关传闻，其实好正常，亦好理解，高普喺利物浦工作9年，创出伟大成就，我现时只希望专注教利华古逊。」不过，当记者进一步问沙比阿朗素会唔会下季成为利物浦领队，佢大笑话：「老实讲，我冇一个直接答案。」明显有兴趣做高普接班人。

沙比阿朗素2022年10月开始执教利华古逊，协助球队大翻身，现时排德甲榜首，领先第2位拜仁慕尼黑4分。曾经有传皇马计划邀请沙比阿朗素回巢执教，但主帅安察洛堤早前已经续约，预料沙比短期内唔会返西甲搵食，令佢加盟利物浦嘅机会增加。