阿根廷球王美斯地位超然，任何同佢有关嘅物品都价值不菲，呢位射手2000年同巴塞隆拿签订嘅「纸巾合约」，将於3月举行拍卖，底价高达35万欧元(约296万港元)。

时间返到2000年12月14日，阿根廷足球经纪加基奥利、巴塞隆拿几位高层及美斯家人喺一间网球会见面，倾紧当时年仅13岁嘅美斯加盟巴塞一事。由於美斯家人担心对方变挂，巴塞时任技术总监列萨治随即喺一张纸巾上写下「临时合约」，由双方签字，白纸黑字承诺一定会签入美斯。

随住美斯打出名堂，呢段经历亦成为佳话，加基奥利将「纸巾合约」当成宝物，放入保险箱，巴塞隆拿曾经建议将「纸巾合约」摆放球会博物馆，但谈判失败未能成事。事到如今，加基奥利决定委托英国拍卖行进行拍卖，预料将於3月18日至27日举行，巴塞隆拿如果想将呢张咁有历史意义嘅「纸巾合约」放入球会博物馆，就需要加入竞投，巴塞隆拿近年陷入财困，愿唔愿意破财，就不得而知。