去片睇文仙尼失落自己提早离场

周三(31日)凌晨亚洲盃16强，沙特阿拉伯踢到补时9分钟，被南韩逼和1比1，最终互射12码败落出局，沙特主帅文仙尼嬲爆，未等射完12码，就提早离场，似乎已经意兴阑珊，可能打算辞职。

两队互射12码期间，南韩领先3比2，仲未知胜负谁属，文仙尼就自己一个人步入球员通道，似乎已经打定输数，最终沙特阿拉伯果然落败，莫非呢位59岁意大利名帅有未卜先知能力？

赛後文仙尼话：「我本来唔想走，但南韩有2次主射机会可以胜出，我预计比赛已经结束，我需要道歉，并感谢球员嘅努力，比赛有胜负，我哋今次喺带有运气成份嘅互射12码输咗。」

文仙尼上年8月突然辞去意大利国家队领队之位，接手执教沙特阿拉伯，签下一份2,500万欧元(约2.1亿港元)年薪嘅4年合约，但沙特由文帅领军後，表现一般，今届亚洲盃举行期间更加发生将帅不和事件，加上16强止步，难怪当佢步离球场时，外媒指文仙尼已经放弃球队。