周三(31日)凌晨英超出现令人意外赛果，护级球队卢顿主场以4比0大胜白礼顿，爆出125倍波胆，前锋伊利亚艾迪巴约表现光芒四射，个人轰入3球，成为卢顿自1990年9月以来，首位喺顶级联赛上演「帽子戏法」嘅球员。

卢顿发动闪电战，开波1分钟就由伊利亚艾迪巴约近门顶入打开纪录，仅过2分钟，奥宾尼单刀推过门将积臣史迪利，射入空门，为卢顿迅速领先2球。呢支新升班球队得势不饶人，继续抢攻，并喺42分钟由伊利亚艾迪巴约窄角度射成3比0。

换边之後，伊利亚艾迪巴约顶入角球，完成「帽子戏法」，呢位身高1米93嘅26岁前锋今季英超已经有8球进帐，表现令人惊喜。伊利亚艾迪巴约来自尼日利亚家庭，佢本身喺英格兰出世，仲未有国际赛经验，有资格选择代表呢两支国家队，据悉伊利亚艾迪巴约倾向为尼日利亚披甲。

卢顿愈战愈勇，各项赛事3连胜，加上同日英超爱华顿作客打和富咸0比0，卢顿今仗赢波之後升上联赛第17位，暂时逃离降班区。