周三(31日)凌晨英超，阿仙奴凭「耶稣仔」加比尔捷西斯射入1球及1次助攻，作客以2比1击败诺定咸森林，取得2连胜，仅落後踢少1场嘅榜首利物浦2分。加比尔捷西斯唔止成为兵工厂赢波功臣，并且刷新纪录，呢位巴西国脚职业生涯60场有波入嘅英超赛事，所属球队都保持不败。

阿仙奴月初拉大队去杜拜集训，果然重拾勇态，继上仗大胜水晶宫5比0之後，今仗亦占尽上风，控球率高达74%，战至65分钟由加比尔捷西斯窄角度射入打开纪录，仅过7分钟，呢位绰号「耶稣仔」嘅前锋传畀布卡约沙卡射成2比0。诺定咸森林喺89分钟由艾禾尼尔入波追番1球，但无阻阿仙奴全取3分。

加比尔捷西斯今仗表现出色，打破4场入球荒，赛後佢话：「我之前操练时受伤，又遇到一啲问题，好感谢球队上下对我嘅信任，我觉得自己踢得唔错。」包括效力曼城时期在内，加比尔捷西斯累积60场英超取得入球，佢所属球队取得55胜5和，成为英超史上入波不败场数最多嘅球员。