车路士中坚堤亚高施华虽然已经39岁，但喺英超作战仍绰绰有余，今季车路士21场联赛佢踢咗20场(19场正选)，成为普捷天奴嘅必然正选。季尾约满嘅堤亚高施华日前暗示，佢嘅英超生涯已进入倒数，传闻佢下季可能回流巴甲富明尼斯。

堤亚高施华目前合约季尾完结，同车路士亦冇进行续约谈判，呢位巴西老将表示：「依家每踢完1场波，我都觉得系最後1场，感觉有啲伤感，但我为自己场上表现开心，呢一点系最紧要。」巴西传媒报道，佢曾经效力过3季嘅富明尼斯，准备喺夏天迎接堤亚高施华回巢。

对於回流巴甲收山，堤亚高施华表示：「我未有任何计划，我知道足球生命差唔多完结，但依家仲未完，我仍然保持到好嘅表现，交出唔错嘅数据，令我可以好平静咁继续比赛，未来嘅事就交畀上帝安排。」