曼联中场美臣蒙特自上年11月对卢顿之後，一直因伤缺阵，原本早前已经可以喺户外操练，但近日又要返回室内独自训练，领队坦哈格都话唔知呢位25岁英格兰国脚几时可以复出。

曼联上年夏天豪花6,000万镑(约6亿港元)向车路士收购当时只剩下1年合约嘅美臣蒙特，已经引起争议，最大问题系佢成「魔」後表现欠佳，而且经常受伤，抖多过踢，季初第2轮英超对热刺之後，就因伤缺阵6场，上年11月第2度受伤。

坦哈格原本预计美臣蒙特上月复出，但如今仍未成事，呢位荷兰名帅话：「蒙特伤完又伤，佢觉得好沮丧，我好同情佢，并支持佢，必须确保佢完全伤愈，先至可以派佢上阵，唔可以操之过急，希望蒙特季尾可以复出。」

另外，坦哈格透露，上场被换离场之後，左脚需要敷冰嘅中坚利辛度马天尼斯，并非受伤，只系一种预防措施。