曼联中场马恩奥上仗英超踢到补时，个人表演射入靓波，协助红魔鬼绝杀狼队，技惊四座，人气亦急升，根据英国《泰晤士报》报道，加纳足总已经派人游说呢位喺英国出世嘅18岁新星「认祖归宗」改为代表加纳国家队，意味英格兰随时会失去1位天才猛将。

马恩奥嘅父母系加纳人，佢喺英格兰史托港出世，有资格选择代表英格兰或者加纳国家队，呢位全能战士过去曾经系英格兰U17、U18、U19上阵，但仲未晋身大国脚。据悉英格兰主帅修夫基上年年底曾经同马恩奥见面，希望佢选择代表「三狮兵团」，但修夫基并冇承诺会徵召佢入国家队。

加纳近年积极招揽「海外兵团」，曾经游说阿仙奴前锋尼基迪亚代表呢支非洲劲旅，但未能成功，今次又瞄准马恩奥。加纳足总董事局成员艾比话：「马恩奥系1位极具天赋嘅球员，我哋会继续游说及吸引佢选择为加纳披甲。」英国舆论认为，修夫基应该徵召马恩奥参加今届欧国盃，以免人才流失。