周一(5日)凌晨西甲「马德里打吡」，皇家马德里主场大部份时间领先下，喺补时阶段失守被马德里体育会逼和1比1，依家仍以2分力压基罗纳排榜首，不过巴西前锋云尼斯奥斯祖利亚喺开波前热身受伤，下场对基罗纳嘅榜首大战上阵成疑。

皇马阵容开波前出现变动，云尼斯奥斯喺热身期间颈椎受伤，原本大会宣布祖斯奴代替担正，但开波後先发现巴谦戴亚斯先系正选。巴谦戴亚斯亦成为今场奇兵，20分钟入波为皇马领先；马体会之後力图反扑，终於去到93分钟由马高斯洛兰迪头槌笠入，追成1比1完场。

皇马教练安察洛堤赛後表示：「我哋踢得好，应该要赢波，最後关头失波系唔够运，我哋嘅高度唔够系会有问题，不过我哋仍然系榜首，而且交出令人满意嘅表现。」