周日(4日)英超赛事，车路士喺主场经历噩梦败仗，领先下以2比4反输狼队，近2场联赛狂失8球。堤亚高施华老婆赛後公然喺社交网提出换帅，领队普捷天奴亦承认阵中冇人位置系「安全」，表示要为惨败负责。

车路士上仗1比4惨负利物浦，今仗迎战狼队，19分钟就由高尔彭马开纪录，点知防线之後中门大开，马菲奥斯根夏3分钟後为狼队追平，完半场前再有阿素迪沙斯摆乌龙，令狼队反超前2比1。换边後车路士继续沉沦，马菲奥斯根夏入多2球完成「帽子戏法」，车路士尾段由堤亚高施华入波，追番2比4冇咁肉酸。

车路士跌落联赛第11位，完场後大批主场球迷报以嘘声，并高呼前班主阿布拉莫域个名，就连巴西中坚堤亚高施华嘅老婆Belle都加入「反普」行列，赛後喺社交网留言：「系时候要改变，再等嘅话就会变得太迟啦！」

普捷天奴赛後就惨败道歉，承认自己帅位并唔安全：「我哋唔够好，呢个系现实，我系第1个要为呢个情况负责嘅人，阵中有一个人系『安全』，我唔会话全部都系球员错，所有人都有责任，依家嘅成绩配唔起车路士嘅历史，但我哋唔可以放弃。」