利物浦嘅英超冠军梦周一(5日)凌晨受到重击，佢哋作客阿仙奴竟然连环自爆，最终1比3输波，「兵工厂」重返争标行列之外，亦将积分优势送返畀曼城。利物浦「出事」嘅球员系向来最稳阵嘅艾利臣比加同华基尔云迪积克(VVD)，领队高普拒绝怪责2人，认为低级犯错只系「一时意外」。

阿仙奴今场决心极大，开波就压住利物浦狂攻，14分钟夏维斯单刀射门被救，布卡约沙卡补射建功。一直捱打嘅「红军」喺完半场前意外扳平，路易斯迪亚斯趁威廉沙列巴解围迟疑，抢波後省中加比尔马加希斯反弹入网，利物浦靠乌龙波追成1比1返更衣室。

下半场两队形势均等，点知利物浦後防就玩自爆，67分钟艾利臣同VVD应付长传出现误会「撞车」，加比尔马天尼利直接射入空门；88分钟利物浦中坚伊巴希马干拿迪拉跌夏维斯，2黄1红被逐，补时阶段李安度杜沙特左路狂推，窄角度射门被VVD轻微闩到下，穿过艾利臣大细龙门入网，利物浦最终1比3落败。

利物浦本土赛事21场不败走势断缆，依家仍以2分领先阿仙奴做「1哥」，但比踢少2场嘅曼城仅多5分，优势荡然无存。高普赛後表示：「我哋今场踢得唔好，好多赛前嘅构想都踢唔到出嚟，但要接受现实，恭喜阿仙奴拎到值得嘅3分，利物浦亦会继续前进。」

对於艾利臣同VVD出现罕见错误，高普就话：「失波好奇怪，我觉得系唔好彩，呢啲失波唔系经常出现，亦唔会经常出现，但的确有可能发生。我哋2个主将出现误会，证明佢哋都只系凡人，亦显示佢哋一向交出嘅稳定表演更加难能可贵。」