今季表现差劲嘅水晶宫，周六(3日)晚英超作客1比4惨负白礼顿，仍然喺降班漩涡挣扎。球队成绩唔好，领队鹤臣责无旁贷，不过佢今场做咗一个「超错」决定，就引嚟球迷极度不满，纷纷要求水晶宫将佢炒鱿，鹤臣嘅被炒赔率亦急跌，随时冇得捞！

水晶宫今仗半场已输3粒，不过鹤臣半场仍选择派啱啱伤愈嘅米高奥利斯落场，结果呢位王牌球星踢咗10分钟再次受伤，水晶宫最终输1比4兼折损大将。赛後大批球迷怒轰鹤臣，认为喺「败局已定」情况下唔应该冒险要米高奥利斯上阵，直指呢个系「最差决定」，并要求鹤臣辞职谢罪。根据SkyBet赔率，鹤臣以1.4倍成为英超下个离任领队大热。

鹤臣赛後解释：「军医同奥利斯自己都话畀我听，佢今场可以出任後备，下半场上阵完全冇问题，好不幸我唔会知道佢会旧患复发。你可以话输0比3点解仲要派佢上阵，因为我哋带佢嚟比赛，就系谂住畀佢下半场上阵。」