意甲爆发榜首大战兼国家打吡，「1哥」国际米兰主场火并「2哥」祖云达斯。国米今季最大目标系重夺联赛冠军，虽然依家稍占优势，但主帅施蒙尼恩沙基唔敢大意，「祖记」遇强最叻玩龟缩，加上近年交手例少交收，预计双方会踢得小心翼翼，2.5球细盘乃不二之选。（Now 638周一凌晨3时45分直播）

施蒙尼恩沙基入主国米後，连续3季夺得意超盃，但想升呢为名帅，拎联赛冠军系基本，偏偏「细恩」就未尝此滋味，入主首季领先下遭A米後来居上，上季失分太多而转攻欧联获亚军，今季最大目标系重夺联赛冠军。

依家国米位居榜首，领先「祖记」1分兼打少1场，确系有优势，踢咗21轮入50球只失10球，无论进攻定防守都冠绝意甲，队长拿达路马天尼斯现以19球排射手榜1哥，不过「细恩」吸取前季教训後唔敢托大，今仗会稳中求胜，唔会畀「祖记」有翻身机会。

「祖记」今季冇份踢欧洲赛，反而因祸得福专心打国内赛事，现时系唯一能威胁国米嘅球队，主帅阿里基功不可没。「阿帅」最叻系睇餸食饭，依家材料有限下，场面肉酸又如何，最紧要拎足3分。「祖记」今季16场联赛胜仗，有10场都系险胜1粒，尤其系对住强队，绝对唔介意玩龟缩，今季对A米、罗马同拿玻里，咁啱都系赢1比0，佢哋今仗当然想偷鸡拎晒3分，但前锋米利克坐波监，而且双方积分差距咁少，就算赢唔到都唔好输，一定摆好铁桶阵死守。加上两军近5次碰头，全开2球或以下，入球细捧得过。