宾福特前锋艾云东尼被视为英超最佳前锋之一，佢之前因为违规赌波被罚停赛8个月，上月复出後状态大勇，踢3场联赛已入2球，成为阿仙奴、车路士等豪门争夺目标。宾福特领队法兰克日前证实，艾云东尼喺夏天将被出售，势必令转会市场腥风血雨。

法兰克接受丹麦杂志《Tipsbladet》访问表示：「其实都好明显，艾云东尼夏天会被出售，卖走球队最佳球员肯定会好贵，但另一方面，夏天佢只剩低1年合约。我哋知道艾云东尼嘅价值，呢个世上冇几多前锋劲过佢，作为领队我梗系想佢一直留队，但终有一日会见佢喺顶尖球会比赛。」

据报宾福特喺上月为艾云东尼叫价1亿镑(约10亿港元)转会费，结果未有球会出价，消息指阿仙奴同车路士都会喺夏天出手，艾云东尼就属意加盟细个支持嘅阿仙奴，但需要两间球会先达成转会协议。